老細推動下,依家我哋全公司都用Signal

近期因為WhatsApp改變私隱政策,會同FB同IG分享用戶資料,令「刪WhatsApp轉用Signal」成為熱門話題。 我估計大部分香港人應該暫時都係得個講字,主要通訊工具仍然係WhatsApp。無他,通訊工具唔係你一個人話轉就轉到,你啲溝通對象唔轉,你拎住個新app根本無用。 不過我就已經成為咗Signal嘅重度用戶了,雖然暫時主要只將Signal用於同公司同事溝通,公事為主,不過起咗個頭,我相信我用Signal嘅時間應該會越來越多。朱西拜拜! 事緣係咁,我公司大約一百人,老闆同幾個主要高層一直黃黃哋,對FB近期嘅言論審查早有不滿。公司嘅宣傳貼文觸及率下降,亦激到佢死,多次發誓永遠杯葛FB。當然最後都係死死氣咁用返,邊用邊屌。 不過當WhatsApp事件發生後,佢就下定決心轉用Signal,仲喺公司同事間力推,而同事們都一呼百應。Download個app唧,down完發覺無人用咪del鬼咗佢囉。 據老細講佢自己轉得幾徹底,唔止喺公司用,連屋企人都一齊用,甚至部分客戶都陪佢癲。當然佢仍然有用WhatsApp同客傾嘢,或者聯繫長輩,不過佢聲稱用WhatsApp嘅時間已經減少起碼50%。 講真,老細叫我哋轉用Signal時,係有少少大石壓死蟹同道德綁架,基本無乜得比員工選擇,手法相當乞人憎。不過我就無乜所謂,除咗我自己都好唔妥朱西同WhatsApp處理私隱嘅手法,同埋我覺得即使老細逼到我哋裝app,但如果大家都唔用,堅持用返WhatsApp,其實老細都只能死死氣用返WhatsApp,依家齊齊裝Signal咪當比個機會大家用手指投票,睇吓邊隻app會勝出。 我公司就大部分同事都轉咗用Signal同同事溝通。老細帶頭起示範作用,成日專登喺Signal發放重要訊息,當然係原因之一。而除此之外,其實同事們都幾享受用唔同嘅app同唔同嘅人溝通,起碼send錯訊息嘅機會都大減啦! 對於Signal嘅感覺,其實講真同其他同類app分別不大,轉換成本僅限於溝通對象會唔會齊齊搬,基本上無乜適應上嘅問題,亦都無乜只能用WhatsApp先能夠做到嘅嘢。大家棄用WhatsApp轉用Signal,我唔敢講成事機會好高,但如果真係有呢一日出現,我一啲都唔會覺得出奇。我係朱西嘅話,我會即刻諗點樣對用戶好啲,而唔係只關心點喺用戶私隱裡面挖錢。

Read more

我學校8成同學想報護士,然後移民

香港近年發展,大家有目共睹。我呢輩高中學生,絕大多數都想移民,至少都認同應該將「移民」呢樣嘢放喺人生選項裡面。等如「結婚」,你將來唔結係一件事,但大部分人都唔會將呢個選項完全排除。 睇住香港越來越墮落,唔想自己或將來嘅下一代活喺極權之下,當然會想移民。移民就當然首選諗英美澳加同台灣。不過問題嚟喇,首先係點樣成功令人收留自己,即係取得居留權甚至入籍;第二就係去到之後靠乜嘢生活。 首先講吓第一個問題先。各國移民政策時鬆時緊,要成功移民時易時難,不過整體似乎都係難。台灣同英國呢期好似相對容易,但個門檻始終都唔係低。去台灣要先投資百幾萬港紙,唔係人人都拎得到出嚟。英國講到有本BNO,過去生活幾年就可以長住咁。不過事實上,香港好多人,咩原因都好,係無BNO嘅。 不過我諗對比「獲居留權」呢樣嘢,更困難嘅係喺外國靠乜嘢生活。本身有錢果啲唔好計。一般人喺外國點同人爭工做?幾十年前相傳去美國可以靠洗大餅捱大啲仔女,但依家全球經濟都差,洗廁所都唔夠本地人爭,咁點生活? 對於以上兩道難題,我班同學心目中嘅解決方案就係:做護士。 我班同學,尤其啲女仔,本身明明好怕血,亦唔鍾意照顧人,見親傷口都we嘩鬼叫,但係為咗移民,同移民後在外國有工做,都決定豁出去,以做護士為人生目標。 一大班後生仔女抱住呢種心態去入行,當然係醫護界之悲哀,病人之惡夢。但無計,無錢又想移民,護士確實係最佳選擇。好多國家爭住要護士,唔驚無國家收留之餘,仲幾乎保證有工做,人工仲要唔低,真係絕世筍工。 其實做醫生亦都好吃香,問題係醫科難入。反而讀護士,渠道就多好多。入到傳統大學嘅護理系degree固然好,但入唔到的話,都仲有東華學院、公大之流可以選擇。早幾年醫療最缺人果時,連社會福利署都搞護士課程,依家唔知仲有無。總之,喺我輩同學心中,護士係一份你肯做就有,而且可以幫助移民嘅好工。 當然,我都唔係咁天真,當然明白荀嘅嘢總有啲伏。護士工作辛苦、厭惡性、工時不穩定、壓力大等都係令人卻步嘅原因。不過對比繼續留喺香港做鹹魚,去外國做一份極度辛苦嘅工作,但放工後可以享受民主自由,放假可以呼吸新鮮嘅空氣,仔女返學唔洗驚比人洗腦。留喺香港定去外國,應該點揀真係睇你點睇。我同級嘅同學就8成都選擇寧願搏一搏,或者至少都讀咗(護士)先算。 據聞近排投考警察嘅人數不斷試新低,咁嘅人工福利水平,居然收唔爆人,實在相當可恥。凡事都有因,導致呢個果嘅因係乜,我諗都唔洗點討論。唔知幾年後護士嘅就業人數會唔會忽然創新高呢?近日政府又有新政策,試圖推香港青年上大灣區工作。我諗我哋選科嘅取向,已經好明確話比個政府知,我哋有幾想去大灣區。

Read more
Close
讚好香港醬聞FB
醬聞隨時送上