我在迪迪尼故意對過千港人說普通話,8成人會應機,當中一半人竟然這樣犯賤

我喺主題公園做過兩年,見盡大陸人啲衰格嘢。不過我又諗,唔係香港人咁都忍到佢哋,比人X到上面都仲笑口噬噬咁對住班「恩客」,香港駛淪落到咁?所以香港嘅淪陷,我覺得係香港人自己做成的,係香港人犯賤,天生鍾意比人X,墮落與人無尤。 我在主題樂園做嘢嘅兩年間,為咗玩嘢,同埋想印證吓香港人係咪真係咁犯賤,我不時實驗式咁試下同港客講普通話,兩年間都玩咗過千次,而我發現,當你用普通話同港人講嘢,當中近8成人都會應機,有兩成人就係聽唔到或者無禮貌或咗為捍衛本土語言,係唔應我甚至會睥我的。 人哋用咩語言同你講嘢,應一應人都係禮貌,唔算犯賤嘅。應我嘅港人當中,有一半人會應返我廣東話「你好」或者「蝦佬」,又或者點頭笑一笑。至另一半人當中,有一半會用普通話同我講返「你好」。而繼續講落去,有一半人係講到正常至流利嘅普通話同我溝通。至於剩返果另一半,我就真係覺得好犯賤。 呢班人,居然會笑口噬噬咁,強行用古天樂溝崔世安式嘅普通話,腰部微曲,頭輕抬起,如奴才見到主子咁用普通話同我傾計! 我只係一個公園職員,佢哋係客,當然無需要奉承我,佢哋咁嘅反應,我估係因為慣咗。佢哋平日一開口講親普通話,就係咁嘅奴才相,所以對住我,都係咁嘅衰樣。我強烈懷疑佢喺沙沙返工,經年累月,比客X完又比老細X,X完再出返去繼續彎腰服侍恩客,久而久之,一開口就沙沙上身。佢哋習慣咗,無論對方幾咁難頂,幾咁俗氣,即使你明知佢只係一個社會底層嘅人,但只要佢開口講普通話,你就要即刻變做狗,要當對方神咁拜,要彎腰抬頭講普通話,因為你明白佢哋即使著對爛布鞋,都隨時會買過萬蚊嘢,無咗佢哋,你會冚家剷。 甘心做狗嘅香港人我諗唔會係大多數,之但係呢班人往往在第一線與大陸人接觸。大陸人來到香港,第一次同港人互動就係呢班狗,再加上佢哋喺電視見到代表香港出嚟講嘢嘅又係咁樣嘅人,漸漸地,佢哋對港人嘅印象,就只有一個字-「狗」,全部都係狗。 香港淪陷,與其怪大陸人低質素,不如怪香港太多人型狗,一個充滿人型狗嘅地方,點會有人尊重?不過好消息係,一個地方當狗多到一個點嘅時候,人就唔會再去,剩低啲狗喺度互相咬噬,成為真正嘅人間煉獄,一拍兩散。

Read more

做社工做到嬲,個綜援人士問我:姑娘你做嘢咁辛苦為乜

雖然「新移民婦拿萬三蚊綜援」係假,但綜援人士生活並不一定都很難過,卻是千真萬確。因為綜援人士乜都有政府津貼,生活唔太講究的話,舒舒服服過日子其實真係得,你接觸得多綜援人士就知。 另一個角度睇,今時今日香港失業率低到咁,有手有腳真係無話搵唔到嘢做。咁都要拎綜援,唔少都係自己嘅選擇,多於命運嘅作弄。而你如果係都要幫佢哋搵嘢做,就係捉錯用神,吃力不討好,對大家都係盞搞。 我初入行做社工,都係滿懷理想,諗住幫助弱勢社群,令社會更加平等。不過做咗幾年嘢,漸漸發覺原來弱勢定強勢,並唔係咁容易劃分。 我誤打誤撞,加入咗「自力更生就業支援服務」,即係幫綜援人士搵工,未搵到嘅就逼佢哋做義工,初時我都覺得呢個工作幾有意義,理念亦都唔錯,讓綜援人士都可貢獻社會,對佢哋個人或者社會都係好事。 但係講就咁講。 上文都講到,喺今日攞綜援,除咗長期病患者、老人家或者部分單親未婚媽媽之類嘅真弱勢社群以外,多數係自己選擇。老病婦孺想做都有心無力,而其他好人好姐選擇得呢條路嘅,佢會有幾想做嘢,大家心中有數。初時入世未深,滿懷熱血咁諗住去幫佢哋,又會按佢哋嘅喜好同能力去安排義務工作,但換來嘅係極度冷淡嘅回應,甚至係無回應,我崩潰到試過返工果陣跑入廁所喊。記得有一個「來自鄰國嘅婦人」同我講:「姑娘,妳做嘢咁辛苦為乜唧?」果吓我先如夢初醒,明白晒成個玩法。 從此,我唔再用「幫助佢哋」嘅角度去做嘢,相反,我係「求佢哋幫我」嘅角度出發,令條數好好睇睇咁就算。好多綜援人士同我講,香港啲福利算係咁,啲議員要幫佢哋爭取呢樣嗰樣,佢哋暗啞底都覺得多餘,爭到就爭,爭唔到其實佢哋都無乜所謂。出席記者會嗰啲好extreme嘅case,好多時都係friend底,可能係長期求助開嘅個案,絕無廣泛代表性,真係唔好以為綜援人士個個都慘絕人寰,最慘嘅往往係無綜援、無公屋果啲(好似我咁)。 一時感觸,打篇嘢上來呻吓,無特別想表明啲咩。如果你都認同我嘅講法,就請分享,有錯漏嘅亦歡迎指教,多謝。

Read more

80後中坑遭公司退回升職申請,人事部:仲有成排70後未升

「80後」呢個詞出現之時,主要係形容一班1980年代出世嘅後生仔,時光飛逝,今日呢班後生仔好多都已經變晒中坑。 我自己係80中,一直都覺得1980年代出世嘅人大部分都係中伏嘅。早一代嘅70後,出身時社會環境好,撞正移民潮嘅大時代,機會唔少。樓價大部分時間都唔癲,好彩嘅話,廿幾三十歲時結婚撞正沙士,60萬買淘大到家已經供甩晒咁滯。 相反,80後最早果批一出梨做嘢就遇上沙士,之後雖然有段時間好景,但好快又樓價狂升。家好多為樓而惆悵嘅,唔少都係80後,捱過沙士、抗衡海嘯,三十幾歲諗住結婚生仔之時,點知樓價升到飛街,唔去日本都買唔起,人生極盡灰暗。 仲有最灰嘅,係八十後在踏入三字頭,諗住事業上大展拳腳之時,先發覺社會上嘅上流空間已經停滯咗。除非閣下非常outstanding,例如名牌大學神科畢業,或者工作表現異常突出,否則排排坐等升職嘅話,真係等到海枯石爛都未到你,而到你時,公司又可能已經嫌你老。 造成咁嘅局面,有三個原因,首先,係80年代之前,香港人口都係爆發式增長,家好多五、六、七十後都仍佔據著高位;第二,人越來越長壽及健康,你睇吓張建宗呢啲1951年出世,做到家都仲開晒口話下屆都仲想「繼續貢獻社會」,你諗吓如果個個界別都有個張建宗,呢個世界真係唔使轉;第三,香港啲工種越來越單一,發圍機會唔多,近幾年好似多咗啲後生仔出來創業,但始終唔似美國果啲不斷有新經濟湧現。 你諗吓,五、六、七十後個個佔著高位,又個個都健健康康未使退休,工種又越來越窄,八十後又邊有機會上位?而我foresee九十後條路將會更困難。 唔係話世代批鬥,但數字上睇嚟,對八、九十後嘅職場之路真係唔樂觀。當然,都唔排除社會改變,林鄭上場之後忽然好多新工種出現嘅可能性,但我自己就唔樂觀囉。最近筆者有個朋友在一間大機構申請升職,好快就比公司turn down咗,而公司嘅理由,講到明係仲有好多「更具資歷」嘅員工準備提升,非常赤裸,完全無話你適唔適合,亦唔講你能力達唔達標。你話間公司好僵化咩?但香港仲有邊間大公司唔係壟斷晒港人衣食住行,僵化住咁做生意都可以賺大錢?純粹舉一個例子,例如X頓麵包,你話入面做嘢係咪真係需要咁多新思維?我已經唔講地產霸權下嘅仲更加壟斷到出晒面嘅行業。 你唔服,好想改變現狀,當然值得祝福,只係英雄都需要環境,關公生於太平盛世一樣無運行,希特拉如生於經濟好嘅年代,佢嘅主張亦唔會有人show佢。你身懷絕技,但時代唔適合,條路就點都會艱難啲,更何況你並無絕技。做人要努力,但結果未如人意時,亦無需太過介意,安安分分做人,世界依然有美好一面。共勉之。

Read more

加一服務費,根本應改名為「租金幫補費」

香港的餐廳多數都有收加一,加一全名為「加一服務費」,理論上,佢嘅原意係你班食客既然享用咗服務員提供嘅服務,又唔識do,唔自動自覺比貼士多謝服務生,咁餐廳就唯有代收,然後再分返比有份提供服務嘅人。 理論上,「加一」唔一定係食物總額嘅10%,而應該係你覺得服務人員嘅服務值幾多,就比幾多。不過香港人不嬲怕煩,又習慣比人欺壓,老闆們睇穿咗呢一點,所以就劃一將貼士定為10個巴仙,點知香港人又受喎,於是呢個傳統就傳到家。 不過呢個都唔係重點。 雖然成件事老老土土咁,但始終係你情我願,又唔係偷呃拐騙,十個巴仙咪十個巴仙囉,比唔起呀! 其實我想講嘅係,工人嘅權益問題。 理論上,呢十個巴仙係顧客打賞比員工嘅,餐廳代收咗,應該分返比員工。但係你問吓飲食從業員,有無人分過呢啲小費? 你話可能薪金已經包埋呢。但係咁點解多客果個月,人工都無變過,一樣係咁多嘅呢?你估係老闆好人,貼士少收咗,但照比咁多我吖,定係老闆由頭到尾都無分過收到嘅小費比我呢? 可能你會話老闆其實都好慘,各種成本都貴,啲貼士你就當幫補吓,唔係啲食物又要加價㗎喇。 咁我想問,飲食業嘅成本最大係乜嘢?人工佔得幾多成?租金又佔幾多成?你估你比嘅貼士係幫補佢出糧請多個人多吖,定係幫佢交租多吖? 所以我話,在地產霸權之下,不如老老實實叫果十個巴仙做「租金幫補費」,擺明係幫老闆交租,支持佢喺地產霸權下爭扎求存,而唔係打賞員工嘅「小費」,更加唔係啲咩「服務費」,我哋嘅錢,從來主要唔係用來買服務,而係拎來幫人比租。 而我大力建議,呢十個巴仙我哋應有權決定比定唔比。點解食餐飯都要我奉獻比誠哥,前世欠佢嗎?

Read more

我阿媽講純正廣東話,應徵譚仔失敗

話說,我阿媽見啲仔女已經大晒,喺屋企無無聊聊咁,見到屋企附近嘅譚仔貼紙請人,於是咪去試下應徵,點知衰咗,唔請。為咗呢件事,佢都有啲唔開心,覺得自己好似好廢咁,連譚仔都唔請佢。不過,從中我反而見到一個更嚴重嘅人口洗牌問題。 我阿媽50歲到,香港出世。雖然無乜學歷,但個樣四四正正,份人都幾醒目。據我觀察,做譚仔阿姐其實字都唔使識寫,認得幾隻字,識得喺部智能手機度㩒掣落單就得,應該無乜技術性,但佢哋都有一個共通點:據我觀察,譚仔啲阿姐99.9%都係有鄉音的。 佢哋嚟到香港,努力工作,呢點我係絕對尊重的,但係成個現象就令我有啲唔舒服。例如譚仔阿姐見到客雖然都會講廣東話,會問你「阿腥,食mood嘢」,但佢哋私下傾計時,就會轉tone,同鄉就講鄉下話,非同鄉就講普通話,佢哋自有自己嘅世界,香港人在佢哋眼中,始終係外人。 當然你會話,咁好正常吖,香港人去到外國,都會同返香港人玩多。但如果,全香港好多行業,唔同公司,都係咁嘅情況呢?如果你入到一間金融公司,入面個個都係北京讀書嘅,佢哋同聲同氣,一齊睇大陸卡通片大,飲同一支假可口可樂,你估你呢個Kong U港燦仲有無機會上位?如果你走入一間IT企業,人哋個個都係阿里巴巴、百度同騰訊嘅前員工,你估你能唔能夠好暢快咁每日同佢哋一齊食晏? 譚仔唔請我阿媽,我唔知原因係咩,我哋亦無乜所謂,反正唔係靠佢開飯。反而我會驚佢入到去,同啲同事唔啱傾,會做得唔開心。我阿媽呢啲就話無所謂,但係我哋年輕人,出來搵工做賺錢養家,但去到間間公司都好似譚仔咁,你可以點?當高、中、低技術工種都被非本土人佔據嘅時候,你可以點發圍?最近就嚟落台果個特首日日叫人返大陸做嘢,就係想加速人口洗牌,想加速將香港各界職場變成譚仔,本地人嘅生存空間,只會越來越細,直到香港完全「被融入」大陸為止。

Read more

最銀憎人販賣本土,乜香港餐廳可以唔made inHK咩

近年香港自身文化不斷被蠶食,「本土」忽1間成為稀缺資源,本來最普通不過的東西,竟然有了市場,更吸引了不少商家借此作噱頭,借「本土」名義購錢。 一般來講,這也無傷大雅,反正「本土」確實快要滅亡,商人拿「本土」招牌出來讓港人慎終追遠一下都好,不過,凡事都要合情合理合邏輯,成件事先好睇,唔會核核突突。偏偏,香港就是多核核突突的事,每日在挑戰我們的品味。 最近在東九龍某大商場行街時見到一間餐廳,名叫「Made in HK Restaurant」,未食過,但見到招牌已反感。首先,根本完全唔明關「香港製造」咩事。香港的餐廳,難道可以唔在香港製造的嗎?就算麥當勞,啲食材在美國設計,大陸生產,但來到香港咪又係要香港啲阿姐去煎同組合包裝,都係made in HK,唔通麥記又要強調自己「香港製造」? 唔講邏輯,我講吓個情懷。在我自己來講,一講香港就會諗起嘅食物,有魚蛋、雲吞麵、雞蛋仔,再唔係就啲港式茶記嘅豆腐火腩飯果啲,但「Made in HK Restaurant」無論裝修定餐單,都只有歐美情懷。 據聞呢間嘢係海南少爺啲friend,其官網介紹自己「Made in HK Restaurant,為傳統港式西餐換上新裝,藉此向這本土獨特飲食文化致敬。」Sorry,唔覺囉。其實一間餐廳叫咩名我真係無意見,只係眼見香港嘅真「本土」漸漸消亡之際,格外珍惜,唔希望有人不斷濫用、消費呢個term,加速佢嘅滅亡。

Read more

女友比毅進警扑咗,自此我領悟到一個道理

我同女友喺大學識,到家拍咗6、7年拖,拍到第4年左右,女友已經提過想結婚。我之前覺得我女友算係好女仔,佢最大願望係成家立室,相夫教子,同埋佢係讀幼兒教育嘅,所以好想生小朋友後就唔做嘢,佢認為全職媽媽對小朋友發展好啲。 而就係呢一點,我同佢就有啲分歧。鬼唔知全職媽媽好咩,但哪有錢?我唔係讀咩神科,畢業出嚟話就話做marketing,實則就打雜,乜都做,人工得萬零蚊,到家都未夠2萬,又唔係老豆大把,講真養自己都麻麻哋夠,點養埋老婆加個仔? 所以一講到結婚,我唔係唔想結,但真係太多嘢要諗,所以唔敢承諾太多。女友可能以為我唔嗲唔吊,所以傾親都發脾氣,漸漸地,感情都受到影響。 唔知係咪7年真係一個大限,踏入第7年,我同女友關係已大不如前。女友逢星期六、日都放假,但成日話有嘢做唔同我出街,問佢做咩又講到唔清唔楚,想話去佢屋企坐吓又阿支阿左,結果我哋成兩、三個月先見一次,我當然好明白,呢個係分手嘅先兆,大家只係等緊一條導火線。 但我真係估唔到條導火線會咁激。 我不嬲知我女友有個中學男同學曾經媾過佢,但失敗咗,之後做咗好朋友。佢哋一直有保持聯絡,但都係facebook互相like吓啲相嗰種。我女友有時都會喺我面前讚佢,話佢中學嗰陣係不良少年,讀到中五就無讀書,後來自強不息,去讀毅進,之後考咗入警察,再到公開大學進修,依家竟然比佢升咗督察,有樣有身型有事業,大讚佢係「筍盤」。 結果,我女友比呢個「筍盤」扑咗,有埋BB。 女友約我到沙田新城市Starbucks傾返清楚成件事。佢話有一段時間覺得同我好淡,好唔開心,所以搵咗阿威-即係果位「筍盤」出來傾計,點知傾吓傾吓,竟然有咗感覺,之後就開始偷偷哋拍拖,仲有搞嘢添。佢陀緊個BB就係有一晚好激情嘅狀況下,不安全地製造出來。果日我哋啱啱嗌完交。 女友對於自己所為,無乜悔意,佢比我感覺甚至係覺得飛得我太遲。我問佢嚟緊有乜打算,佢話會同阿威結婚。之後,佢終於講出重點: 阿威雖然只係毅進仔,但碌咗入警察,再HEA讀埋個公開大學degree之後,晉升為督察,變成高薪一族,仲要係鐵飯碗,出面經濟不景、裁員、業務重組,乜都唔關佢哋事。仲要有得申請宿舍,退休可住公屋,又有長糧,一家人從此生活無憂,啱晒我女友嗰啲追求穩定嘅人。 我聽完佢講,有啲震撼,但未至於崩潰。話晒都咁多年感情,唔開心梗有,但我更唔開心嘅,係自己嘅人生。我努力讀書,大學畢業,做嘢都叫盡責,晚晚OT,典型香港仔成長路,如果喺幾十年前,我應該已經結婚生仔買樓。但今時今日,如果你唔係社會上最outstanding果班人,你嘅人工就基本上無可能追上政府工,而做政府工嘅人,其實唔一定比你叻同努力。 就好似嗰位阿威,我女友都承認佢思想仲係好幼稚,除咗因為佢本身個人係咁,再加上佢加入咗一個好保護性強嘅體系裡面,所以無乜重大經歷會令佢成長。但就係咁嘅人,都可以安居樂業養家,反而在社會掙扎打拼嘅有為青年,就因為社會結構嘅問題,成功機會少之又少,真係要問一句:「公平咩?」 我相信傳統智慧,努力總有出頭天呢句話我至今未敢完全否定,但係,在現今嘅社會結構裡面,我嘅成功會如何發生,我真係答你唔到。 傾多一陣,阿威就來接佢。阿威好熱情咁同我握手,好似新相識咗個朋友咁,我覺得佢真係好傻hi。之後佢扶住阿儀去停車場,一隻手fing住條Toyota車匙,一隻手不時摸吓阿儀個肚,兩個人嘅眼神都好似好滿足咁。我望住佢哋背影,決定放開一切,獨自踩單車返屋企,準備應考下個月嘅CRE。

Read more

如我係牛角AA男主角,都會燥底打女人,我會寧願佢「咁樣」做好過

今日蘋果報導「牛角AA制」引發的男女打交事年,原來係37歲男士不滿女方提出AA制,所以釀成衝突,最終打人。相信絕大多數網民都估唔到原來真相係咁。不過諗深一層,如果我係個男主角,我諗我都會打人。 約得網上新相識嘅女出嚟食飯,動機唔一定邪惡,但一定唔會係「咁啱大家得閒不如一齊食飯」果種囉。以香港嘅文化,男士出得嚟同新識嘅女食飯,梗係要威威豬㗎啦!你睇吓佢哋嗰餐飯張單,飲酒都飲咗千幾蚊,呢啲帳單一睇就知,好明顯係男士係咁豪叫嘅,擺明一大樽鹽(尊嚴)放咗喺枱面。到埋單嗰時,你竟然夠膽無視佢樽鹽,好似驚佢比唔起咁話要同佢AA?梗係佛都有火啦! 當然,個女人提議AA,可能都只係有啲唔好意思第一次出嚟就要人請咁貴,但對正在「豪得性起」嘅男人來講,呢啲根本唔係女人埋單嗰陣應有嘅態度。如果我係個男主角,假若個女伴直頭同我搶單,話佢要請返我轉頭,我反而會欣賞妳係一條烈女,但係妳依家又話出一半,搞搞吓又話出五百,大佬,妳依家當我乞兒咩,五百蚊我大L把,撕爛佢咪撕爛佢囉,駛比面妳條臭西?我相信個男主角當時好有可能係咁諗。 其實好籠統咁講,呢件事上面,可以睇到其實大部分港女係好considerate嘅,某程度上都會幫男人諗吓,不過就硬係接通唔到男人最心靈深處果一點需求,亦唔能夠好溫婉咁處理男女間嘅互動,變相有時有啲位令男人難受咗都不自知。 據聞香港男士北上娶妻有年輕化跡象,當中應該真係有人係貪北女比較識得摸透男人嘅心,唔好話雞唔雞呢樣嘢住先。所以各位港女還望好好努力,為阻擋中港融合出一分力。 加油呀! 香港醬聞獨家刊登,轉載請附連結

Read more

東涌做愛的故事

唔知好彩定唔好彩,2004年時,我一家人入住咗東涌逸東邨。我覺得好彩嘅係,總算有間公屋住,唔好彩嘅係,其實東涌嘅規劃真係好仆街,搞到拍拖都會比較容易出事。 東涌,規劃上同其他新市鎮如天水圍及將軍澳等分別不大,但我個人認為東涌比香港其他所有地區都要悲情。而逸東邨係東涌最大嘅屋邨,當年政府求都無人肯入去住,結果房署要用「人均面積較大」作招徠,成功氹到一班想住得舒適嘅人,包括我老豆,搬嚟呢個萬劫不復之地。 我話東涌唔好,最主要係指對窮L而言。喺天水圍做窮L,尚且可以搭幾蚊車去元朗玩(that’s why 元朗咁Q多人,因為要entertain埋天水圍人,仲有強國遊客等),將軍澳就更方便,去觀塘果啲都近。但住東涌,要跨區就閒閒哋廿幾三十蚊車費(單程),根本就係焗你原區消費。 我同條女都係住逸東,原區讀書,屋企環境都唔係好,零用錢就唔好提。我哋拍拖,多數喺番東涌,但最慘係東涌根本無嘢好搞!同將軍澳、天水圍一樣,東涌係無街的。東涌有的,只是大型懶高檔商場同領展商場。領展商場無咩好行,而東薈城就更加唔係比香港人行。想睇戲,點知唯一嘅戲院都摺埋(當初我仲信周浩鼎真係會幫我哋爭取保留戲院)。 而最大問題,喺東涌,係想搞嘢都唔得!游蕙禎講嘅「年青人無地方扑嘢」,我深同感受。我同女朋友屋企都有人無返工,因為地區偏遠,東涌好多人搵唔到原區工,就索性唔做嘢。而我哋屋企人因為嫌遠嫌貴,亦係絕少跨區去街的,所以我哋屋企長期有人。至於去開房,首先係貴,另外就係遠。東涌方圓十里都係無房可爆的!搭車去旺角,粒幾鐘車,去到都軟晒,港島區好似近少少,但搭港鐵去到香港站,都要行成十分鐘先去到中環站,仲要再轉車,去得嚟乜mood都無晒。 我同條女一齊咗兩年,拍拖生活一啲都唔豐富,嘢又無得搞,我覺得同東涌規劃絕對有關。我唔會怪東涌呢個地方,先天位置無得搞,遠就係遠,但係正苦規劃就絕對係失敗!政府只提供生存空間比東涌居民,但就無諗過東涌居民除咗生存,仲要生活。東涌人生存係無問題,但生活就要自己諗計。但政府明知呢度無其他區支援,點解唔規劃得好啲?搞到戲院都無間,真係純粹商業嘅問題,正苦一啲責任都無?東涌其實環境幾好,夠大,又山明水秀,規劃得好啲嘅話,絕對能成為自成一角,自給自足嘅社區,但就係規劃唔好,搞到東涌變成一個懨懨悶悶嘅死角,依家話再遠啲嘅梅窩有居屋賣,唔少人爭崩頭想買,我就會以過來人身份,勸佢哋唔好高估自己嘅適應力同唔好錯誤期望每個社區都會慢慢變得完善。有啲地方真係會越來越唔完善的。 香港醬聞獨家刊登,轉載請附連結

Read more

我做薩利亞,無資格上公屋

我叫阿傑,就快26歲,同老豆老母加個妹同住公屋,平時除咗返工就係打機,典型廢青一名。我自細有讀寫障礙,成績一向都唔好,讀到中三比人踢出校,之後求其讀啲嘢,就出咗來做嘢。 我無學歷,又無特別技能,亦都無乜興趣或志向,偶然行街見到薩利亞請人,於是就入咗去做。飲食業,仲要係樓面,當然就唔係咩好工,不過都有萬幾蚊人工,總算達成咗阿媽細個果時要我「月入過萬」嘅期望,雖然今時今日一萬蚊已經唔係錢。 喺薩行利亞裡面,我識咗條女,係同舖同事嚟嘅,同我一樣廢青一名。佢對人生無咩期望,但求完成到結婚生仔等人生階段就好。其實我都係咁嘅人,講真,我呢啲仲講咩理想抱負吖,但求有瓦遮頭,有兩餐溫飽咁就算啦。就係大家都有共同理念,所以我哋拍咗拖唔係好耐,已經開始諗將來一齊生活嘅問題。 而當我哋認真啲去諗點樣一齊生活時,成個人當堂灰晒。我哋從來無諗過買樓,因為自知無可能買得起。但我一直以為我哋可以申請到公屋,即使要等足十幾廿年,都叫做有得等。但係我哋去房署一問,先知原來公屋個入息限額原來低到咁離地。兩個人加埋唔可以超過$17350,而當我哋結咗婚生一個小朋友,3個人嘅入息亦唔可以超$22390。 大佬呀,我同條女兩個人都做薩利亞,照計夠晒基層啦,但兩個人加埋都有兩皮幾人工,生埋個仔都唔符合資格。呢個入息上限擺明唔係為我哋香港人而設。我有個叔父,50幾歲人先上大陸娶老婆,咇咗個B出來,幾年就一家團聚兼上啟德公屋,老婆唔使做,日日同啲同鄉打牌跳舞,不知幾爽YY。 我又有個friend,廿歲左右就同條女註冊,跟住就各自同屋企人住,要入息審查就辭工,直到上到樓先一齊住同正式組織家庭。呢個玩法香港人都可參與,但第一你要對你嘅愛情充滿信心,第二係你要喺好後生果陣就搵到另一半,結果好似我咁,26歲先拍拖,咁你就排得嚟都蚊訓。 講到呢度,我忽然好反對政府起公屋,反正起來都唔係比我哋呢啲香港仔住嘅,你起來關我咩事?政府係咪想所有香港人都要娶個唔返工嘅大陸老婆先可以上樓,以作獎勵?我老豆老母果代,就算係基層,捱吓捱吓都叫做有瓦遮頭,湊大仔女,起碼過到一個完滿嘅人生,但我哋呢一代,人生仲可以有咩希望?有人可以解答到我呢個問題嗎? 香港醬聞獲授權轉載

Read more
Close
讚好香港醬聞FB
醬聞隨時送上