水泉澳邨一到暑假即變鬼城,有屋無人住

個個都話喺香港有公屋住好幸運,從財務角度去睇,呢句說話無錯。但係從生活質素睇,就真係睇吓你住邊條邨。

例如我住緊嘅水泉澳邨,話就話新樓,但啲建築仲化學過30年前啲樓。不過我覺得最大問題都唔係喺呢度,啲鄰居先係最大嘅問題。

依家啲權貴成日叫人去大灣區,其實水泉澳邨咪已經係大灣區。喺呢度你基本上唔會聽到廣東話。啲鄰居幾乎全部嚟自惠州、福建、汕頭汕尾等。 而更重要係,佢哋個個都心繫祖國,除咗生活習慣同語言等都堅持要用返大陸模式,佢哋一到週末就會返晒大陸。

早排暑假,成條邨幾乎變咗鬼城,影都無隻,全部人都返晒鄉下。我果條走廊,只有一個獨居老人同我一家留喺香港,走得最快果個,個仔朝早最後一日返學,放學就直接搭直通巴士上咗去。我真係好想問佢:係咪真係急到咁?

香港好多人無屋住,佢哋喺香港出世,無屋住就無屋住。但我班水泉澳好鄰居,一走就成個幾月,好明顯有屋住,香港只係佢哋其中一部分生活,呢度生活唔到,佢自然會去過返另一種生活,反正大把退路。我有個鄰居,兩公婆都係大陸人,來自兩個唔同嘅鄉下,兩邊屋企都有屋,香港有咩事,佢哋大把地方走,但係土生土長嘅香港人就無退路,逼上梁山就唯有訓麥當奴或者機場。

我真係好唔明,唔係話中港融合嘅咩?唔係話香港係中國不可分割嘅一部分嚟嘅咩?點解房署連個申請人在大陸有無樓都查唔到?存款、股票果啲查唔到都算,有樓無樓唔係一打開個file就見到嘅咩?點解依家香港咁得意,傾一地兩檢嘅時候就係中國嘅一部分,一講到資產就變返一國兩制?龍門任你搬到咁,你叫呢個世界點樣尊重你?

Close
讚好香港醬聞FB
醬聞隨時送上