真係唔想再喺大學canteen見到強國學生

依家香港啲大學,尤其夜晚啲part time課程,大部分都係強國學生報讀,搞到校園烏煙瘴氣,我真係唔想再喺大學校園見到呢班「未來專才」。

上堂啲騎呢嘢先唔講住,單係canteen,已經可以感受到班「非本地學生」(教育局用語)嘅氣燄。

上得夜晚堂果啲,多數都係日頭返工,夜晚進修果種。如果係香港人,多數放工趕到canteen,快趣食完就上堂,絕大部分都斯斯文文,盡量安靜。

相反班專才,個個都唔使返工咁,晨咁早霸晒啲大枱,十個八個圍晒喺度用京腔高談闊論,大聲講更大聲笑,搞到成個canteen嘈過街市。大佬,我哋放工趕嚟上堂咁辛苦,只係想上堂前安安靜靜食個快飯唧,咁都唔得?

以前大學canteen到夜晚就好少人,依家拜各類自資課程所賜,夜晚都勁多人,想搵個位坐都難。但專才們好多時都10個人霸晒成張16人大枱,咁人哋圍晒圈咁,我哋啲港燦仲好意思搭枱咩!結果港燦席往往4人枱坐足6個人,而專才們則有位擺袋又可蹺住腳,手搭住另一張椅嘅椅背,好悠然咁談論世界大事,真係見到都眼火爆。

不過最令港燦大開眼界嘅,係專才們嘅品格。依家大學canteen多數人都會自己食完自己拎個盤去回收處,但會咁做嘅專才,我見就少之又少。撩完牙將牙屑向地下吐嘅情境我就見得多。我亦見過捧住餐嘅專才將阻住佢去路嘅椅一腳踢開,呢啲都係好衝擊港燦價值觀嘅行為,多謝專才們讓我們免費上國情教育。

至於排隊買飯打尖果啲,咁講真,話晒都係專才,又唔會好似迪士尼旅客咁強行攝入嘅,不過人多時借位攝吓攝吓就梗有。另外就嚟排到時即刻呼朋喚友一齊點餐,最終一個人排隊但買十幾份餐果啲,就更加係家常便飯。

最後,我只係想講,我哋香港人咁辛苦,花咁多錢去進修,除咗為自己前途,唔少人係真係想享受一下大學生活。但係當逼車逼人逼到去大學時,一入校門就好似返咗大陸咁,你叫香港人點樣可以無怨氣?

Close
讚好香港醬聞FB
醬聞隨時送上