強烈呼籲同胞別到西貢淪陷區,識玩梗係去粉嶺高球場等私人會所

十一黃金週來臨,香港照例逼爆內地客。唔知幾時開始,有內地客或省錢或體驗大自然,居然到西貢紮營代替租酒店,輕而將西貢變做淪陷區。當年日軍又槍又炮,打得咁辛苦先佔領到香港,依家同胞們用幾張高鐵飛就做到,真係唔好話唔犀利。

報紙報導有同胞因擔心西貢會湧入大量同類,所以寧願早啲入去玩,玩完就趁同胞們未殺到就執嘢走人,可見淪陷區可怕到連內地人都怕。

其實計我話,西貢呢啲多同胞到好似返咗祖國嘅地方,去唔去都罷啦,要喺香港深度遊,梗係去啲暫時冇乜大陸人去嘅地方,例如禮賓府、粉嶺高爾夫球場,或者各個私人會所之類。

呢啲場所雖然唔係成日開放,但對好多大陸人嚟講,喺門口影下相已經係深度遊。如果仲係唔滿意,佢哋甚至可以集體去信要求嗰啲私人會所開放俾祖國同胞參觀,反正嗰啲會所嘅用地多數都係屬於香港政府嘅,而香港政府又係屬於中國嘅,只要中國人齊心,發起要求參觀私人會所,你估佢哋夠膽唔開門迎接?

中國對香港偉大無私嘅愛,當然唔能夠只有上水、西貢同圓方嘅居民去領受,各私人會所嘅會員們更加應該與同胞們多啲交流,多啲同佢哋一齊打吓golf游吓水,讓同胞們感受一下香港美好高端嘅一面,返上去唱好香港,吸引更多人來,咁香港就真係唔發都難喇!

Close
讚好香港醬聞FB
醬聞隨時送上