資質平庸嘅中學同學,只因為大學揀啱科,依家人工係我三倍,有車有樓

人生際遇嘅嘢真係好難講,三衰六旺自有定數。我有個中學同學,自細乜都一般般,無論讀書運動定溝女,都無乜突出表現,甚至往往係中下游果批。但結果,全因大學揀啱科,依家佢成為我哋班同學中最好景果個。

佢揀嘅係今日已成為神科嘅職業治療,當年無乜人留意,但今日一畢業已至少3皮幾。當日佢誤打誤撞,覺得IT、BBA(我哋係70後,當年呢啲係神科)應該無行,所以先揀職業治療,據佢講,當時佢根本唔知職業治療係咩嚟。

當年同學中比較標青嘅,其中一個揀咗IT,畢業初期好好景,之後被裁員,從此一沉不起,近日轉咗行做地產。一位揀BBA,諗住一畢業就去大公司做管理層,點知一直載浮載沉,雖然僥倖避過幾次裁員,但都無機會再升,而遲佢入職嘅,因為時機問題,好多都高人工過佢(佢人工每年幾個%咁加,但某啲位嘅起薪點一年已經升一倍),令佢十分無癮。

反而果位職業治療師,畢業時未發生沙士,醫院好少請人,佢無奈之下唯有去做文員。之後發生沙士,政府開始加強醫療方面嘅開支,啲乜乜治療師忽然變得好景,人工差唔多年年加7成,依家40幾歲已經有7萬幾蚊人工,雖然唔算飛黃騰達,但供樓養車無難度(佢仲要係08年果陣買落)日日朝9晚5準時收工,天未黑就已經返到屋企享受人生。

可能佢成個人生所賺嘅錢,未必夠我另一個top sales朋友多,但top sales日日帶住老母返工見客,做到hihi,未到12點都返唔到屋企。話就話年薪百萬,但有時賺好多,有時又食穀種,好唔穩定。而職業治療師就年年跳point,好早已經可以預視自己幾年後嘅人工,進修或置業都可以好有預算,對我嚟講呢啲先係羨煞旁人。

據聞家連社工呢科都爭崩頭,相信唔多唔少都係因為社工都屬薪高糧準嘅工作。我個年代係要好熱心嘅人先會揀讀社工,但今日好多人就為咗穩定有糧出而去投身呢行,只能夠講世界已變,香港變得更快。喺香港,生存都係一件難事。有學者講過,當年輕人個個都想去做公務員,呢個社會就出事,衣家香港就係咁。原本香港係一個處處機遇,充滿活力嘅地方,衣家就變成令人茫然,年輕人唔知出路嘅鬼城。The city is dying,呢句咁簡單嘅英文一出就成為金句,正正反映出時代嘅悲哀。

Close
讚好香港醬聞FB
醬聞隨時送上