區外人唔知,其實東涌一早已淪陷

東涌呢排日日上報紙,又被封為「新上水」,因為港珠澳大橋通車後,果度日日逼爆強國旅客,更出現「中國巨龍」,幾百人肉貼肉咁排出長長嘅隊伍,真係睇見都得人驚。情況之嚴重,連鼎爺都不得不承認區內居民「生活受到影響」。保蝗人士會講呢啲嘢,已經算好激進㗎喇。

唔係住東涌嘅人唔知,其實早喺港珠澳大橋開通之前,東涌早已經淪陷。東涌最大商場東薈城一早已經唔係比居民行,入面啲所謂outlet根本只係搵大陸人笨嘅商店。最近電視日日見到東涌有一大班大媽阿叔踎晒喺地下,其實幾年前東薈城周邊都已經係咁。

所以我一直都話東涌係比天水圍更悲情嘅城市,只係因為東涌有較多私人屋苑拉高個curve,啲悲劇先無咁明顯。東涌啲公屋同天水圍一樣,好多都係比新香港人住,而且兩地一樣都係位處偏遠位置,交通費同物價都貴到癲。不過東涌比天水圍更悲嘅係,天水圍街坊都仲可以搭幾蚊車去元朗或屯門買嘢,但東涌居民就只能硬食區內商戶嘅欺壓。天水圍街坊唔想同自由行逼埋一齊,留喺天水圍就可以,但係東涌居民就只能在區內同大媽們搏鬥。依家再加埋港珠澳帶來嘅人流,基本上東涌已經可以certify。

我認識嘅人當中,已經無人鍾意住東涌,只係無錢搬出去咁解,大家都留名等睇全東涌嘅屋邨商場都變晒金舖同藥房。隨住港珠澳大橋嘅開通,東涌加速沉淪,同時為香港敲響喪鐘。

Close
讚好香港醬聞FB
醬聞隨時送上