我問隔離大媽點解成日返大陸,鄰居回:傻仔,我上面大把樓

我住上水某新落成屋邨,呢條邨出晒名9成人都唔喺香港出世,加上近大陸,所以一到長假就會變得好靜。全邨唯一食肆大家樂,平時長期滿座,但一到長假期就連夜晚勁受歡迎嘅打邊爐都得小貓幾隻,非常詭異。

我隔離屋一家4口,仔女讀小學,一到學校假期就閃人,直到開學前一日先返嚟。佢哋份人無乜嘢,平時都有打吓招呼。前兩晚收工見佢哋拖晒喼咁返嚟,例牌問聲係咪去旅行(明知唔係),佢哋話啱啱大陸返嚟。

我好奇問佢哋點解一有假就返大陸,乜唔辛苦咩?第二日又要返工返學……

大媽答我:「依家返大陸咁方便,點會辛苦,我過海仲遠啦!」

「但留喺屋企休息咪仲舒服?」我追問。

「梗係唔係啦,大陸不知幾好住呀!我覺得喺大陸舒服啲。」大媽表情明顯話緊我公屋仔見識少,不屑同我呢種港燦講嘢。

「咁你就咪鬼落嚟啦!」我串佢。

「咁香港睇醫生同讀書好啲嘛,去旅行又方便啲,唔係我都唔鬼落嚟呀!」佢話。

唔知係咪講到興起,佢又繼續爆響口話:「我哋喺大陸有幾間屋㗎!」

我突然好奇心大發,問佢:「得罪問句,你老公又唔係做生意,又唔似係高官或者富二代,點買到幾層樓?」

大媽藐晒咀,擺明笑我傻仔:「廣東好多人本身有祖屋,仲要唔止一間。近年發展得快,好多村比發展商收嚟起樓。發展商要收地,就要賠比啲村民。通常發展商會比村民揀要樓定賠錢,我哋揀咗要樓,一間換一間咁賠。之後有啲我哋賣咗再買其他,有啲就收租,我哋村好多人都係咁發達。」

我聽到硬晒-個拳頭,質問佢:「咁你仲住呢度,自己喺香港買一間私樓做上等人啦!」

佢直頭笑埋出聲:「咁政府比你住你唔住咩?香港啲公屋又靚又方便,洗乜買樓?買咗樓就真係做唔到上等人喇,供到你死。香港啲樓咁貴,有錢我都寧願去吓旅行好過。」

我無同佢爭論落去,其實佢講得非常有道理。同樣,加拿大如果比埋屋你叫你去住,你都會即刻仆過去啦。依家香港政府咁好招呼,大陸人唔嚟都對唔住自己。呢個唔係我鄰居嘅問題,係香港同大陸政府嘅問題。香港嘅資源,就係咁樣透過無能嘅狗官同嚴重向大陸傾斜嘅政策,一點一滴咁葬送。

Close
讚好香港醬聞FB
醬聞隨時送上