我老豆話成班街坊發誓:一票不投民X聯

我老豆係典型嘅藍絲,喺佢角度嚟睇,世界上所有抗爭都係源於啲人唔知足、貪得無厭、或者背後有政治勢力搞局。佢投票必投民X聯,偶爾會同班街坊一齊幫手做議員義工。佢認為民X聯啲人關心佢哋,至少會叫得出佢哋啲名,亦會定期噓寒問暖。你唔好理呢啲係真情定假意,但人與人嘅聯繫往往就係靠呢啲溝通,呢一方面民X聯確實係有擺心機落去做嘅。

之但係,最近某一晚食飯時,我老豆忽然好勞氣咁話,佢同成班街坊,以後「一票不投民X聯!」當時新聞正講緊長者綜援改為65歲先拎得。

我老豆同大部分佢熟嘅街坊一係就唔需要在65歲前申請長者綜援,一係就晨早過咗65歲,嚴格嚟講呢單嘢並無直接損害佢哋嘅利益。而呢項政策嘅改變,表面睇亦同民X聯無直接關係。咁點解我老豆同班街坊嘅反應會咁激烈嘅呢?佢哋過往亦係「綜援養懶人」理論嘅信徒,依家點解又忽然間為此而動氣呢?

我老豆解釋完比我聽之後,我發覺雖然大部分藍絲自私,有時睇嘢比較天真,但佢哋唔係傻嘅,對於潛在利益嘅走向,佢哋比鯊魚對血更加敏感。

根據我老豆嘅理論,雖然長者綜援由60歲延至65歲,表面影響唔係好大,亦無搞著佢哋,不過佢哋知道,呢個只係第一步。延得去65歲,遲啲就唔爭在延到70甚至75歲。當政府有個緊縮嘅取態,咁其他福利包括醫療同教育等,亦有機會削減,無人可以獨善其身。另外我老豆認為,呢個政策最大嘅問題,係反映政府對老人唔尊重。我老豆自己都就嚟60歲,暫時身體健康,公司唔執笠,照計應該會繼續做落去,但呢啲嘢話唔埋,突然有病或者公司摺咗,就想做都未必有人請。政府涼薄到咁,佢覺得心寒。

而遷怒民X聯,係因為佢哋覺得點解呢個黨平時好似好關心老人家咁,但喺呢件事上竟然無人出聲。我話其實泛民都無乜人出過聲,佢話果班福街更加唔好提。

我老豆不嬲支持填海,但最近醫院逼爆同埋長者綜援事件,令佢都不禁大鬧政府有錢填海無錢照顧老人。我串佢話你依家先知呀?點知佢心水好清,佢話過千億盈餘分晒比市民,你估呢度係瑞典呀?佢認為政府同市民應該有來有往,填吓海又派吓糖,咁先凝聚到民心。呢鋪政府做得堅難睇,好似師奶仔咁,買餸搏命打十元八塊斧頭,儲儲埋埋貪心走去買倫敦金就一砲過唔見幾十萬。

經過呢件事之後,佢對林鄭政府同一眾保皇黨極為不滿,希望佢哋到選舉時仍然記得呢單嘢。我就已經剪定報,到時貼出嚟日日提佢。

Close
讚好香港醬聞FB
醬聞隨時送上