一個前楊岳橋忠粉的懺悔

楊岳橋由關鍵一席變成關鍵缺席,老實講,我一啲都唔意外。我曾經係楊嘅忠粉,當年有份呼籲身邊親朋好友唔好投6號(梁天琦)投7號(楊岳橋)。當時我認為AY好似有多啲實績,似會做到嘢多啲,加上佢雄辯滔滔,好似好有point咁,我當時感覺佢係潮版泛民,點知時移世易,泛民整體墮落,AY亦令人越來越失望。

記得魚蛋革命之後,楊岳橋義無反顧地為各被告提供法律支援感覺好正義;上J5台串J5頻道用簡體字好型;用「AY糖」反擊帛金恐嚇我覺得好有智慧;創「This AY」頻道食字「ThisAV」我覺得好親民。總之,當時我覺得楊岳橋專業又有年輕幹勁,應該有力為香港嘅民主注入新力量。當時嘅我比阿嬌還要天真。

我開始覺得唔對路,係一次陳鑑林欲強行通過196億高鐵撥款,全個立法會竟只有黃毓民一個衝上主席台。而AY呢?佢喺位度拎住個大聲公叫口號。Hi,你好勇武呀!

當時我有不滿,不過講真,果時嘅形勢,其實衝唔衝都無乜用,抗爭除咗喊打喊殺,或許可以有其他更有智慧嘅做法,所以我決定再觀察吓,唔好咁快斷定一個議員做得好定唔好。

幾個月後嘅醫委會改革方案,楊岳橋投咗贊成票。佢事前事後都試圖解釋投贊成票嘅原因,係為咗爭取一個更佳嘅改革方案。當時好多人唔滿意佢嘅解釋,包括我在內。不過我見佢事前事後都用咗好多精力同心思去讓市民了解成件事嘅來龍去脈,我覺得大家只係見解唔同,我諗賣港應該唔會咁賣法,我估可能真係正如佢所講,醫委會係要改革,所以應該先投贊成票通過二讀,爭取機會修正改革細節。當時嘅我已經唔再係義無反顧地支持楊,不過我喺補選仍然投佢。

到佢成功連任之後,表現「有目共睹」。講老實,佢喺泛民裡面算係比較少做柒事嘅一個,但係喺香港政治環境急速沉淪之下,佢亦同泛民班人一樣,乜都無做,反而成日風花雪月,或者顧埋晒啲細眉細眼嘢,任由惡法一單一單咁話過就過。而泛民班人甚至同建制派越走越埋。老實講,依家楊岳橋(及一眾泛民)就算投票支持23條立法我都唔會覺得驚訝。

泛民經常鬧焦土派同攬炒派,話佢哋玩分化,有破壞無建設,但講真,睇完「關鍵缺席」呢個case,有乜法子唔叫人心淡到寧願攬炒,都唔想益票比你班人。楊生個「810扮工室」,依家真係日日扮工,名副其實,無違反商品說明條例,呢一點仍然值得支持。除此之外,sorry,我已搵唔到支持佢嘅理由了。

Close
讚好香港醬聞FB
醬聞隨時送上