老豆想買大灣區樓,比啟晴邨街坊笑佢戇居

我老豆最近好感慨咁同我講,話年輕人喺香港地要買樓根本已經無可能。佢睇廣告見到大灣區樓盤,百幾萬就有600呎,覺得幾吸引,於是想買一間,遲啲退休就返上去住,間啟晴邨公屋就留比我同細佬結婚用。

我老豆無乜政治立場,唔係盲目愛國嘅藍絲,佢明白返大陸住同閒時返大陸係兩回事,不過佢覺得退休嘅話唔使日日落香港返工就無乜所謂,況且佢睇中嘅中山樓又唔係遠,一個禮拜返嚟一次,或者耐唔耐返嚟覆診,坐高鐵都方便,於是開始認真去考慮返上去買樓呢個問題。

佢喺邨入面識好多新移民街坊,於是佢就周圍問啲街坊關於買大灣區樓嘅意見。佢心目中首選係中山,貪比較近香港但又無深圳咁貴,環境又無咁煩囂。次選係惠州,雖然離港較遠,但勝在樓價平,同埋都叫做有高鐵直到。據我老豆講,當佢問街坊意見時,啲新移民都會問佢兩條問題:1. 你上面有無親人;2. 你本身熟唔熟大陸環境。

我老豆老母喺香港住咗50幾年,喺大陸有鬼親戚咩,佢對大陸嘅認識,比每逢周末特登上深圳飲喜茶嘅年輕人更淺薄。啲街坊聽到佢咁講,都異口同聲勸佢打消買大灣區樓呢個念頭。

街坊們嘅理由好直接:大陸樓無話一定唔買得,但係你唔熟地頭,剩係靠香港睇到嘅大陸樓盤廣告,你以為真係會買到筍盤?你以為有肥媽代言,就一定係穩陣?你覺得個盤真係咁筍嘅話,發展商駛花錢喺香港打廣告,大鑼大鼓咁叫人買?大陸同香港唔同,香港地細,買樓買錯地點,都總唔會太離譜,但係大陸地方大,啲樓盤嘅位置衰起上嚟,真係可以連車都無得搭,方圓幾十里鬼影都無隻都夠膽死。佢哋認為中山、惠州等城市本身已經存在,如果個樓盤係正常嘅,根本唔駛強調自己大唔大灣區,打出呢個招牌嘅,9成係搵笨,勸我老豆最好唔好落疊。

啟晴邨啲街坊個個精甩鞭,佢哋仲同我講,話佢哋千辛萬苦要嚟香港,就係因為覺得香港同大陸唔同,而且係香港好過大陸好多果隻。有街坊話,除咗北京嘅領導人之外,邊有人真心想香港變到同大陸一樣吖,咁易嘅話,就無人申請單程證啦。所以個大灣區,佢寫包單一定唔會成功,佢亦勸我老豆唔好咁戇居比啲領導老點,喺香港唔係搞唔掂嘅話,打死唔好上去買樓長住,得閒參加飲食團上去行一轉就無所謂。

我老豆聽到啲街坊咁樣,嚇到即刻打消晒買大灣區樓嘅念頭。但佢仍然好愁,問咁我同細佬結婚點算。我同老豆講,其實台灣同香港都係一小時生活圈,只係高鐵就變咗飛機,你有無興趣退休過去住吖?我老豆一聽,當堂成個人醒晒:「係喎,去台灣咪仲好,又安全啲,空氣又好啲,去乜鬼大灣區吖!」

我提佢:「台灣搵食艱難,不過你退休人士無所謂,但你最緊要要保持身體健康,因為你未必可以直式入籍,用唔到人哋嘅醫保。」

我老豆就話,去到台灣,一定健康過喺大灣,講完即刻上網睇台灣資料,佢用嘅係Google,其實佢無諗過,如果真係住大灣區,佢連Google都無得用。

Close
讚好香港醬聞FB
醬聞隨時送上