女友嫌我買唔到樓,去嫁大陸仔,依家個個月搵我搞嘢

我大學期間,上網識到條女,佢叫Sandy,果時佢仲讀緊中學,大家兩小無猜,一齊開心就得,無壓力之下拍拖,一拍就拍咗成6年咁耐,個個fd都話估我哋唔到。

Sandy唔算係貪慕虛榮嘅女仔,否則都唔會同我呢個讀頹廢大學水泡科嘅公屋仔一齊。不過唔知係咪準備開始步入談婚論嫁嘅階段,令佢睇呢段關係嘅角度唔同咗,定係受社會風氣影響,又或者比佢阿媽洗腦成功潛移默化咗,佢開始介意我買唔到樓。

我話就話有degree,但唔係專業,喺香港嘅人力市場根本無競爭力,我把口又唔叻,做唔到賺佣嘅工作,所以搵錢唔多,畢業時萬幾蚊,到依家都只係賺兩萬頭,其實我覺得已唔算差,不過大家都明,呢個收入喺香港連車位都買唔到。補充一下,Sandy只係中學畢業,賺錢比我更少。

我曾經認定為未來外母嘅Sandy媽媽,就因為買樓問題而多次意圖棒打鴛鴦。Sandy受佢影響,亦對呢個問題越來越重視,多次問我對未來嘅打算,問嘅次數逐漸頻密,問到我發脾氣鬧佢,我哋因為咁而分過幾次手。直到最後一次分手,佢無再接受我氹,無再返轉頭。

幾個月後,我見到佢個whatsapp頭像居然轉咗同個男人嘅合照。個男人剪平頭裝,戴金絲眼鏡,單眼皮,塊面肥肉橫生,睇佢個look成個阿叔咁,但睇佢啲皮膚又好似好後生,於是我即刻whatsapp Sandy嘅閨密問吓咩事。

閨密話我知,原來Sandy阿媽透過大陸啲親戚,介紹咗個大陸仔比Sandy識,個男仔屋企有幾間祖屋,前排比發展商收咗,忽然變千萬富翁。閨密話Sandy同條仔好快打得火熱,已經談婚論嫁,仲勸我死咗條心,唔好諗住追返佢。我話我諗都無諗過,我衰極都仲有少少自知之明。事到如今,仲有咩好追吖,收拾心情識過第二個仲好啦!

喺香港地,媾女同買樓一樣,都唔係容易嘅事。我dry咗成年都未有新女友,晚晚放工打機(唔係飛機,雖然間中都有打),正當開始感到苦悶嘅時候,Sandy忽然whatsapp我。

「最近點呀?」
「有乜點吖,咪又係咁」我hea回。
「有無掛住我先?」Sandy問。嘩,做乜忽然咁挑逗呀?
「都有嘅,不過你都結咗婚啦」我小心翼翼地覆。
「最近仲有無做GYM呀?」Sandy啲問題古古怪怪咁。
「有呀,放工無嘢做嘛」我如實回答,雖然仲未知佢想點。
「好掛住你啲肌肉呀」Sandy似乎喺度誘惑我。

斷估唔係電話騙案,我見Sandy發晒姣咁,於是講嘢越嚟越大膽。啲鹹鹹濕濕嘅對話就唔詳述,總之,佢第二晚就上咗我屋企,大戰咗一場。

佢已經嫁咗比平頭裝,依家住喺深圳,每個月都會自己一個返香港探阿媽,順便住幾日,呢晚佢唔返阿媽度訓,喺我度過夜。我哋赤條條咁喺張床度攬住傾計。

「我最鍾意嘅仍然係你。」Sandy一啖咀埋嚟然後話。
「咁你老公呢?」我問。
「佢對我算唔差,不過我哋唔係好溝通得到。」

平頭裝喺大陸出世同成長,而Sandy就係典型港女,唔洗講都知兩個人根本方方面面都唔易夾。不過Sandy算幾靚女,作為男人,身體溝通到當然重要過心靈上嘅契合。同埋娶咗佢嘅話,佢老公就可以申請單程證嚟香港。Sandy話佢老公有長期病患,想嚟香港公立醫院覆診。

至於Sandy,嫁咗比平頭裝之後,就可以得到夢寐以求嘅樓同背後所代表嘅穩定將來,代價就係無愛情,生活得唔開心。

「你比激情我咪得囉!」Sandy嗲聲嗲氣咁話。
「衰豬,咁都比你諗到」我咬佢條頸一啖,轉身壓住佢,再嚟一場。

之後Sandy每個月搵我一次,喺我度過一晚就返大陸。佢當我係一個寄託,要生活就返大陸,要激情就返香港搵我。似足唔少舔共嘅人一樣,邊度有著數就去邊度,唔諗住對任何一方忠誠,亦唔願意付出啲乜嘢。

「你咁樣開心咩?」搞完嘢之後,我問Sandy。佢沉默咗一陣,最終無答到。

「個平頭裝話有錢又唔係真係好有錢,只係叫做有幾層大陸樓,生活似乎可以安穩啲。但你留喺香港,我哋兩個人一齊捱,租間細細哋嘅屋住,咁樣生活都唔係好差唧,點解咁後生就要為咗樓,嫁個自己唔鍾意嘅人?」我唔係再同佢翻撻,呢啲女打友誼波就足夠,我只係好奇點解佢要為咗樓,咁樣折磨自己。

Sandy擰轉面,無出聲,寂靜嘅空氣凝固喺我60呎嘅小天地裡面。隔咗陣,佢開始抽泣,眼淚逐點逐點滴喺我隻手上面。佢啲眼淚好熱,我覺得裡面包含住好多委屈同無奈,亦可能有後悔或者其他更複雜嘅情緒。香港人註定要為層樓付出好多,但付出整個人生幸福去換取,相信只有入棺材果日先知係賺定蝕。

Close
讚好香港醬聞FB
醬聞隨時送上