喜見12蚊店越來越多日本製產品

為追求高品質又好,為表態又好,純粹崇日也罷,香港人買嘢一向傾向買日本貨。好耐以前,日本貨好貴,但今時今日,隨住科技進步同日圓貶值等原因,日本貨越嚟越普及,大家已經無乜藉口嫌貴而唔買日本嘢。

近日行12蚊店發現,好多平價嘅生活百貨,居然都係日本製造,價錢一樣係12蚊,又平又靚,品質又。。。。。。好老實講,喺低端產品層面嚟講,中國貨又唔係真係爭咁遠,不過日本貨當然會令人更有信心,有啲細微位會見到日本人做嘢始終都係比較細心同人性化,產品精緻度會較高,總之喺價錢一樣嘅前提下,一定日本嘢秤先。不過唔好話一樣價錢,就算日本貨略貴些少,我諗都係大把人會寧願比貴少少買日本製造,尤其今日咁嘅環境。

呢啲就係一個國家嘅軟實力,產品令人有信心,寧願比貴啲都要買你造嘅嘢,會特登搵你啲貨嚟買,甘願接受一切你傳入嚟嘅文化(動漫、AV都係文化),仲有,會稱你嘅地方為「鄉下」,會辛辛苦苦努力工作儲錢,樓都唔買,就係為咗一年去幾次。

所以某國真係唔使拍咁多厲害了乜乜乜嘅戲,亦無必要強推愛國教育逼迫洗腦,你係掂嘅,人人都會爭住愛你,就好似12蚊店,明明係中國貨嘅天下,但就係硬生生被港人愛日本貨嘅強烈需求扭轉,變成越來越多日本貨,中國貨比例有逐漸萎縮嘅傾向。

其實「香港製造」本來都好有號召力,香港以前一樣好有軟實力,不過依家俱往矣,甚至美國已強制「香港製造」都要叫「made in China」,絕對係攬炒絕佳例子。據聞港府同不少愛國商人都堅決反對美國此決定。不過唔知佢哋反對嘅時候,又有無諗過,其實係邊個製造如此局面嘅呢?

Close
讚好香港醬聞FB
醬聞隨時送上