強烈建議天文台對職員引入懲罰機制

作為打工仔,我唔妥天文台好耐。永遠半夜先掛8號波,朝早6點落波;返晒工先嚟掛黑雨,搞到個個變落湯雞;幾乎所有預報都係買大開細,比人笑到面都黃。天文台甩咗「皇家」嘅招牌之後,質素如何,大家有目共睹。

我記得有天文台職員接受訪問,解釋話家天氣反常,所以越嚟越難估計,估到,都會因為極快嘅轉變而要修正,簡單講,即係估錯天氣唔係佢哋嘅錯,係氣候反常所以先出事。我本身係天文白痴,你咁講,我無得駁,唯有繼續抱住半信半疑嘅態度去睇天氣,叫作參考吓咁囉。

但係今日,我真係對天文台失望透頂。之前打風果啲你話氣候反常,好難估,我唔同你拗。但家唔係叫你估幾時打風,只係要你話我聽嚟緊呢幾日係晴天定雨天,你咁都估到離晒罩,我真係無法對 貴台存有任何一丁點信心。

日前,天文台煞有介事咁提醒香港市民,嚟緊呢幾日會落大雨,點知上星期三(5月31日)話完會落雨,6月1日即刻全日陰天,我以為天文台咁堅開口就中,點知6月2日即刻陽光普照。到6月3日,即係今日,更加唔使講,熱到hihi,大雨?巨乳就有唔少,因為天熱太熱,唔少好身材嘅女士都要著小背心出街。

我覺得落唔落雨呢樣嘢,今時今日應該好容易估,無理由錯得咁離譜。估錯天氣,對我嚟講無乜後果,對天文台職員更加無後果,但係對好多人來講呢啲可能係好重要嘅資訊,會影響佢哋一啲決定。我唔敢話天文台唔專業,亦唔係一定個個都斷估無痛苦亂狗咁嚟,但唔排除天文台入面真係有呢啲咁嘅人。所以我認為天文台係咪應該考慮引入一啲懲罰機制,確保職員真係認真專業咁去做估算呢?

我當然明白天氣嘅嘢無話老奉實比你估中,但如果真係純粹買大細咁,要個天文台做乜?如果你有充足理據同資料,有好清晰嘅邏輯去推斷未來天氣狀況,而結果不似預期時,你又有充足證據指出係出現咗特殊狀況,所以導致不同結果,呢個無人怪得你。但係依家到底係推算嘅過程出問題定係天氣出現突變,我哋無從知道。如果引入懲罰機制,由專家去判斷到底有無人失職,情況會唔會有改善呢?

就好似醫生咁,你話我胃潰瘍但後尾我竟然係胃癌,到底係我身體出現突然病變定係一開始個醫生就做錯,呢樣嘢絕對值得深究。

所以我強烈建議天文台引入懲罰機制。

Close
讚好香港醬聞FB
醬聞隨時送上