有無人諗過Celine被負皮唔係因為葡萄,而係成件事本來就令人好唔舒服

最近Celine妹妹參加《全美一叮》嘅事被熱烈討論,當中不少人係留「負皮」,激到十優港姐都走出嚟叫啲人唔好葡萄,之後有不少人都力撐Celine,負皮友被屌得體無完膚,好似留親負皮果啲人通通都係loser,唔撐香港,自己得唔到成功就葡萄人哋,係渣滓廢物,唔死無用。

我想喺度問一句,係咪真係所有負皮友都係因為葡萄而留負評?Celine事件係咪本身都有一啲令人隱隱有點反感嘅氛圍,但大家又唔係好知點講,所以留下冷冷的「老積」、「剩係識嗌高音」等批評,令人覺得負皮友都係厭人富貴嘅loser?

利申,我無喺任何Celine相關嘅影片同報導留過言,更無留過任何負評,但我一睇Celine條片,心裡就有啲唔舒服嘅感覺。我唔識音樂,即使Celine Dion版本嘅《My Heart Will Go On》我都唔係真係咁識欣賞。理性上我知Celine Dion唱得好勁,所以Celine妹妹唱成咁應該都係勁,但係我一睇,就隱隱feel到好多人為操作喺裡面,仲要係專門為咗呢一刻爆紅而去做嘅操作,動機並不純粹,一啲都唔偶然,可能呢個就係我唔舒服嘅地方。等於有條片明明話係偷拍嘅,點知啲片裡面啲路人個個都唔小心望鏡頭,比你會唔會爆粗?

之後,Celine就逐步被起底,原來佢老豆係唱歌老師,一早父女檔簽比蕭定一等,之前佢亦參加過好多中國乜乜乜嘅歌唱比賽,絕對唔係無喇喇石頭爆出嚟嘅一個人。當然,咁係無問題的,更加係無犯法的。莫札特都係父母逼練琴先會成材啦,父母叻,個女有天份,要求佢苦練一下,最終做出好成績,成件事幾美滿吖。

問題係,好多香港人,包括我,已經唔係好buy呢一套。香港人雖然實際上仍然是經濟動物,但係我哋嘅理想模型,我哋嘅精神追求,已經昇華上去真善美嘅層次,而唔係單單「成功」本身。所以,上一輩我哋崇拜李嘉誠,但今日我哋唔會尊敬馬雲。先唔講兩人經營生意手法嘅不同,但係明顯「成功」本身唔再係我哋精神追求嘅唯一。我哋仍然羨慕佢哋嘅身家,佢比一千萬叫我食屎我依然會食,但係我哋知道,我哋已經唔再對呢類人有崇敬之情。

相反,同為富豪,Facebook嘅朱克伯格同Google嘅布林、佩奇,佢哋努力改變世界,追尋夢想,亦助無數人完成夢想,呢種富豪我哋先會由心尊重。同Celine同期有一單新聞,一個香港男仔同老豆遠赴英國踢波,最終成功加入英甲球隊。呢單新聞就引來不少港人的支持留言。再講遠啲,曹星如、李慧詩等人努力追尋夢想,最終取得成功,香港人都係一面倒支持。箇中分別,就係一啲係有夢想,係真善美喺裡面;有一啲唔知有無真善美,但就處處斧鑿痕跡,擺明人為操作,就好似馬雲咁,你係成功咗,都有努力過,但你感動唔到我。

或許Celine係有唱歌理想的,或許參加《全美一叮》及一眾大陸歌唱比賽係佢意願,或許佢同老豆都有諗過利用佢嘅歌聲去改變世界,但當呢啲嘢我哋通通睇唔清楚,但只見佢老豆又撬薛家燕學生,又用盡人脈去幫女兒參賽咁,講真,都唔應該留負皮嘅,見係香港人咪支持吓囉,但我完全理解點解有人會忍唔住負皮佢。

Close
讚好香港醬聞FB
醬聞隨時送上