聖誕痛苦東京遊,全街廣東話普通話

今個聖誕諗住同女友去東京relax吓,雖然卜機票時已估到會好多中港朋友齊齊在日本撞口撞面,但果時心諗東京咁大,總唔會完全避唔到中港人嘅,所以唔諗咁多,決定照去。

去到機場果陣已經心知不妙,人多X到呢,除咗港人,更有好多強國朋友唔知嚟轉機定在香港玩完再去日本玩,總之由機場至上到飛機至去到成田機場,我耳邊都係不斷被廣東話同普通話轟炸。廣東話都仲叫做「親切感」,啲強國匪語真係聽到想殺人。全程似走難多過似旅行,神經比返工時更繃緊,女友面色都唔多好睇,呢一刻我已經開始有啲後悔。

由成田搭JR去上野,我以為自己搭緊東鐵線,全個車廂都係喼,有個強國肥仔不斷在喼上爬上爬落,有幾嘢仲踢到我,我怒睥佢,但個死肥仔就扮無嘢咁。事後女友話我知個死肥仔仲摸咗佢屎忽一下。

酒店check in嘅過程唔使多講,你試過旺季去澳門酒店check in,就明係咩一回事。只係我無諗過日本有朝一日會變澳門。

原本我同女友諗住隨意行吓,無乜計劃行程,所以本身諗住都係新宿、池袋之類嘅地區行吓街買吓嘢就算,但係依家咁嘅勢,呢啲地方我哋通通唔敢去了。即刻上網爬文,其中見到台場地方闊大,亦唔算係大陸人最愛果種購物區,於是決定往台場進發。點知一去到就知中伏,當地竟然有目測至少5個大陸團,再加上無數中港自由行,根本就係尖沙咀!我留港行又一城都無咁嬲!

基本上4日行程我哋都係與一大班香港同強國人一齊度過,成個東京突然親切得無晒旅行感覺。據聞香港聖誕期間有成百萬人離港,即係7分之一人外出旅遊,當中又以日、韓佔多數。啲高官成日話中國好快會追上香港,甚至已經超越香港,咁中國人外出旅遊嘅比例係咪都會好似香港咁?13億人乘以7分之一,加上大部分人都係去日、韓,咪即係每逢旺季都會有億幾兩億人湧去日、韓?真係諗起都驚。

強國有啲官員咪成日驚人民接觸外國文化嘅,其實旅行就係最易被外國文化薰陶嘅方式,我懇求中國官員盡快推出旅遊禁令,唔好再比人民接觸咁多日本韓國嘅邪惡民主思想,中國人要度假,坐高鐵去桂林陪林鄭買火腿就得㗎喇!

Close
讚好香港醬聞FB
醬聞隨時送上