港爸自責:無錢移民,感覺內疚對唔住仔女

作為一個老豆,將仔女帶到一個咁嘅香港,我真係好有罪疚感。我兩個仔女都讀小學,今個學期都未正式踏入校園,學校已經講明要上國民教育。我估呢個都係大趨勢,全港遲早都跟,定已經跟咗。諗起幾年前我哋仲有得「反國教」,今時今日就幾咁嗱喳嘅政策都只能硬食,都咪話唔唏噓! 香港社會狀況急速惡化,已經係不爭嘅事實。以前喺香港做基層,最衰都只係民生層面被壓榨,例如超長工時換間蝸居之類,無錢就無得讀直資學校等。除此之外,香港算係唔錯,人權同自由大致受到保障。 但喺將來,經濟上被壓榨嘅情況相信唔會改善。而更恐怖嘅係,人權同自由,以及法治等都會被嚴重打壓,一諗起將來仔女要喺咁嘅煉獄度爭扎求存,真係好後悔當時帶佢哋嚟呢個世界。希望佢哋將來唔好唔小心得罪某個幹部嘅仔女,以致永不超生;或者同某啲利益集團發生衝突,比人逼入絕路。當然,我都唔會鼓勵佢哋太過關心社會,相信政府都唔鼓勵,滿懷感恩嘅心,愛國愛黨做個小粉紅咪幾好! 既然對香港咁絕望,我當然有諗過移民。但我上網周圍睇啲移民資料,發覺自己連最容易嘅台灣,都無資格去。我唔係專業人士,亦無乜資產,去台灣最少都要拎百五萬去開公司,好失禮,我連人哋最低要求嘅十分一都拎唔到出嚟。 諗到呢度,我嘅罪疚感又嚟,點解當年自己唔好好讀書,去做護士或者外國歡迎嘅專業人士,或者努力搵多啲錢,點解以前台灣移民門檻無咁高時唔早啲預備,要到今日國安法都立埋先去諗? 後悔無益,事到如今唯有展望將來。我幾十歲人,要發圍幾乎無可能,只能寄望仔女,希望自己至少有能力供佢哋去外國讀書,然後移民,離開呢個曾經而不再嘅好地方。 依家我求神拜佛,第一希望疫情同政治環境轉變下,自己同老婆唔好失業,可以好好儲錢比仔女去外國讀書,第二希望將來外國學校仲肯收香港學生,及仍然有渠道比畢業生入籍(依家已經越來越難)。多謝林鄭,我人生第一次有規劃同有具體目標,就只有呢個時候,如果有人生教練問我人生目標係乜,我會答佢,同好多香港人一樣,就係冚家移民。 (本文為讀者投稿,香港醬聞編輯修改)

Read more
Close
讚好香港醬聞FB
醬聞隨時送上