老細推動下,依家我哋全公司都用Signal

近期因為WhatsApp改變私隱政策,會同FB同IG分享用戶資料,令「刪WhatsApp轉用Signal」成為熱門話題。 我估計大部分香港人應該暫時都係得個講字,主要通訊工具仍然係WhatsApp。無他,通訊工具唔係你一個人話轉就轉到,你啲溝通對象唔轉,你拎住個新app根本無用。 不過我就已經成為咗Signal嘅重度用戶了,雖然暫時主要只將Signal用於同公司同事溝通,公事為主,不過起咗個頭,我相信我用Signal嘅時間應該會越來越多。朱西拜拜! 事緣係咁,我公司大約一百人,老闆同幾個主要高層一直黃黃哋,對FB近期嘅言論審查早有不滿。公司嘅宣傳貼文觸及率下降,亦激到佢死,多次發誓永遠杯葛FB。當然最後都係死死氣咁用返,邊用邊屌。 不過當WhatsApp事件發生後,佢就下定決心轉用Signal,仲喺公司同事間力推,而同事們都一呼百應。Download個app唧,down完發覺無人用咪del鬼咗佢囉。 據老細講佢自己轉得幾徹底,唔止喺公司用,連屋企人都一齊用,甚至部分客戶都陪佢癲。當然佢仍然有用WhatsApp同客傾嘢,或者聯繫長輩,不過佢聲稱用WhatsApp嘅時間已經減少起碼50%。 講真,老細叫我哋轉用Signal時,係有少少大石壓死蟹同道德綁架,基本無乜得比員工選擇,手法相當乞人憎。不過我就無乜所謂,除咗我自己都好唔妥朱西同WhatsApp處理私隱嘅手法,同埋我覺得即使老細逼到我哋裝app,但如果大家都唔用,堅持用返WhatsApp,其實老細都只能死死氣用返WhatsApp,依家齊齊裝Signal咪當比個機會大家用手指投票,睇吓邊隻app會勝出。 我公司就大部分同事都轉咗用Signal同同事溝通。老細帶頭起示範作用,成日專登喺Signal發放重要訊息,當然係原因之一。而除此之外,其實同事們都幾享受用唔同嘅app同唔同嘅人溝通,起碼send錯訊息嘅機會都大減啦! 對於Signal嘅感覺,其實講真同其他同類app分別不大,轉換成本僅限於溝通對象會唔會齊齊搬,基本上無乜適應上嘅問題,亦都無乜只能用WhatsApp先能夠做到嘅嘢。大家棄用WhatsApp轉用Signal,我唔敢講成事機會好高,但如果真係有呢一日出現,我一啲都唔會覺得出奇。我係朱西嘅話,我會即刻諗點樣對用戶好啲,而唔係只關心點喺用戶私隱裡面挖錢。

Read more
Close
讚好香港醬聞FB
醬聞隨時送上